فى البدايه كل اللى هتقروه فى المدونه من تويتات تقادم اللى حكى فيها شهادته على تويتر .. وده الاكونت بتاعه على تويتر @taqadum
هو بيحكى عن اللى شافه فى اليوم ده من فض الاعتصام والاعتقالات وتعذيب المعتقلين بوحشيه بمن فيهم عمرو البحيرى ..
هبدأ دلوقتى مع شهادة "تقادم" ::
يوم الجمعة الموافق 25فبراير بعد جمعة القصاص توجهت إلى مجلس الوزراء لأنني حينها عرفت أن هناك لواء جبش قام بالاعتداء على د.ليلي سويف ذهبت لكى أراها فوجدتها جالسة على الأرض وسألتها فحكت لي ماحدث قأخذتها وذهبنا سويا إلى مجلس الوزراء للانضمام إلى المعتصمين أمام مجلس الوزراء انضمينا للشباب المعتصمين وهتفنا ضد حكومة شفيق وانضم لينا بعدها علاء وزوجته منال ومني سيف أخته وحوالي الساعة 2 دخلت الشرطة العسكرية وضربونا بالعصي المكهربة اخذت د.ليلي في ايدي وجريت بيها بعدها على طول قبضوا على عدد من الشباب كان من بينهم شاب طالبنا انهم يفرجوا عنه في هذه الأثناء دخل عدد من الأشخاص يرتدون زي المدنيين لمحيط مجلس الوزراء فأوقفهم الجنود لكن أحد ضباط الجيش قال دول تبعنا د.ليلي عرفت واحد منهم أنه ضابط أمن دولة بدأنا نهتف ليه ياجيشنا ليه أمن الدولة بتعمل إيه،حاولوا ضباط الجيش ابعادنا لكننا رفضنا إلا بعد الافراج عن الشباب تم الإفراج عن الشباب بس فيهم شاب كان وجهه كله دم من الضرب اتضح اني الشاب اسمه عمرو البحيري، ركبناه عربية علشان يروح يتعالج في منتصف شارع القصر العيني وقفوا السيارة ونزلوا الشباب منها ونوموهم,نوموا الشباب وجوههم للأرض وأيديهم متكتفة على ظهرهم وبدأوا في ضربهم، كان الجنود بيشوطوا وجه عمرو وكأنه كورة شراب أسنان عمرو اتكسرت ووجهه كله أصبح دم، جريت بسرعة علشان أمنع الضرب عن عمروفأمسك بي العسكر وتم أخذي إلى مجلس الوزراء وكذلك عمرو والشباب معاه أنا كنت بأمشي على رجلي بس عمروكانوا بيسحبوه على الأرض والضرب شغال فيه وهو غرقان في دمه وبعد ماوصل عند باب المجلس سحلوه تاني وضربوه بالعصي المكهربة وكان بيصرخ من الألم والتعذيب وأنا مش قادر أعمل حاجة له...أخذوني بعدها داخل مجلس الوزراءفي في الجراش .. اللي شفته في جراش مجلس الوزراء مش ممكن أنساه طول عمري شفت الشباب فوق بعض متكومين كأنهم لحم..المنظر كان أقرب لمناظر سجن أبوغريب حسيت اني فعلا في أبو غريب كان الشباب بيصرخوا من التعذيب والضرب وفاقدين الجركة واللي كان بيضربهم جنود صاعقة لأني لمحت شارت واحد منهم كان شعوري في الحالة دي مخبف وبدأت التساؤلات في دماغي هل من المعقول أن يضرب الجيش الشباب يهذه الوحشية هل من الممكن أن يعذبهم هكذا وجاءتني الإجابة سريعة جدا الضابط اللي كان بيضرب في الشباب طلع وقال أنا حريح شوية بس خليلي حقي في العيال اللي حتدخل دي وبعدين نظر إلى وقال انت تبع مين ومين اللي بيديكم الفلوس انتم خونةوعملاء ودمرتم البلد واقتصاد البلد مش مكفيكم اللي حصل انتوا فاكرين انكم لما مشيتوا مبارك كده خلاص يعنى ده احنا موجودين ومافيش حد حيقدر يمشينا واحنا حنوريكم اللي عمركم ماشفتوه.أنا ضحكت لما سمعت الكلام ده وقلت في نفسي الضابط ده أكيد مجنون بعدها طلب من الجنود أنهم يخلعونا ملابسنا خلعنا الأحذية والجواكت والبنطلونات والقمصان وفاشونا تفتيش ذاتي كل ده والضرب شغال في عمرو والشباب من داخل الجراش بيصرخوا من الألم وبعدين جاء عميد وهو أحد المسؤولين عن تأمين مجلس الوزراء قال لهم لبسوهم , لبسنا هدومنا وبعدين العميد قال انت كانت معاك طبنجة والجنود مسكوها معاك في عربيتك فقلت له أنا ماعنديش عربية فقال هاتوا بطاقته أشوفها عرف من بطاقتي أني مدرس مساعد ف الجامعة فقال الجنود قالوا ان الطبنجة دي كانت مع الشاب اللي بيضرب هناك "عمرو البحيرى" فقلت له ده كلام كذب الشاب ده مظلوم ولازم توقفوا الضرب والشاب مظلوم ومكانش معاه سلاح ولا أي حاجة رد وقال الكدب والصدق احنا بس اللي تقول عليه مش حد تاني , قلت له لوسمحت لازم الضرب والتعذيب يتم وقفه حالا وفجأة .. جاء له اتصال فرد وقال أيوه بافندم احنا لقينا طبنجة مع الشاب اللي اسمه عمرو واتضح انها طبنجة صوت بعد ماخلص المكالمة جاءني وقال لي احنا حانفرج عنك بس لو اتكلمت على اللي شفته حتدخل مش حتطلع تاني قلت له أنامش مصدق ده الجيش يعمل كده فينا قاللي لازم نعمل كده لأن فيه عناصر اجرامية عاوزة تهدم الدولة ومش حنسمح بكده وقالى ياريت ماتنساش قلت ماأنساش ايه قالى اللي شفته كانك ماشفتوش تم الإفراج عني ولحظتها تركت الجراش وعمرو بيتسحل هوه وزملاؤه فقلت لعميد الجيش أستحلفك بالله أن توقف الضرب والتعذيب فأصدر أوامره بوقف الضرب وتم اخراج الشباب من الجراش ووضعهم كان صعب جدا أنا زهلت والله كانوا شبه ميتين من الضرب كدت أن أجن والله ركب الشباب الأتوبيس الخاص بالجيش لترحيلهم وعرضهم على المحاكمة .. بعدها مباشرة طلعت على الجزيرة وقلت الكلام ده وكان فيه مؤتمر صحفي لأسر المعتقلين في نقابة الصحفيين قلت الكلام ده برضه واتكلمت مع ناس كتيير منهم كلمت بلال فضل وحسين عبد الغني وكتير جدا الوحيد اللي كتب عن الأمر ده كان فهمي هويدي في احدي مقالاته بعدها مباشرة ود/هبة رؤوف ساعدت في ده صدقوني لما طلعت وقلت الكلام ده والحقائق دي معظم الناس ماكنتش مصدقاني وقالوا مش ممكن الجيش يعمل كده اللي اتضخ بعدها اني الجبش ابو كده .
بعدها كان فيه لقاء جمعني باللواء الرويني وحكيت له ماحصل وطالبت منه الإفراج عن عمروالبحيري وقال لي مش ممكن دول بلطجية ومش ممكن نسيبهم قلت له البلطجية من يقتلون الناس ويدافعون عن مبارك رد وقال انتو تستاهلوا كل ده واحنا مش حنحاكم مبارك واللي انتو عاوزينه اعملوه .. وقلت الكلام ده لكتابنا الكبار وماحدش طلع وكتب حاجة أهو اللي بيحصل دلوقتي أبكر دليل على صدق ماقاله الرويني، أنا مش عارف أقول إيه .
.
.
علشان كده لازم ننزل يوم 25 ونطالب بخلع العسكر من السلطة والمحاكمة لا يمكن أن نترك المجرمين بدون محاسبة.. القصاص القصاص .
........
انتهى كلام "تقادم" بالقصاص القصاص .. " ولكم في القصاص حياة يا أولي الألباب لعلكم تتقون " صدق الله العظيم .. مفيش حاجه اسمها خروج امن مفيش حاجه اسمها نسامحهم دول اجرموا وافسدوا فى الارض ولازم يتحاسبوا . دول عملوا مذابح فى شعبهم متفرقش كتير عن مذابح الصهاينه فى الفلسطينين . دول مجرمين حرب .. قتلوا واعتقلوا وعذبوا ودهسوا وسحلوا وعروا وكشفوا على عذرية بناتنا . خليك قاعد زى ما انت لحد ما الدور يجى عليك او على اخوك ابوك اختك امك اه امك .. العسكر مابيفرقش بين راجل وست كبير او صغير .. ومفيش حاجه اسمها تسليم سلطه اسمها نزع السلطه من المغتصبين دول ومحاكمتهم .
.
وعلى حسب كلام تقادم ان شهادته وشهادة اخرون سجلت وهتتحط على اسطونات وهتتوزع .
.
وزى العاده .. يسقط يسقط حكم العسكر
والشكر محفوظ ل @taqadum صاحب الشهاده ...
ليست هناك تعليقات:
إرسال تعليق